Мақала авторы

Жания Тәженова

Маңғыстау облысы білім басқармасы "Облыстық санаторлық мектеп-интернат" коммуналдық мемлекеттік мекемесі

Ұстаз-ұлық емес, ұлы қызмет

       «Ұстаз- ұлық емес,ұлы қызмет»,-деп Бауыржан Момышұлы атамыз айтпақшы ұстаздың өмірдегі болмысы мен мәртебесі қашанда биік деп ойлаймын. Себебі қай мамандықтың иесі де ең әуелгі білімін ұстаздың алдында үйренеді.

     Менің де өмірдегі таңдауым ұстаздық жолына арналды. Қазіргі таңда Маңғыстау облысы, Қарақия ауданы, Құрық селосында орналасқан «Облыстық санаторлық мектеп-интернатында» биология пәні мұғалімі қызметін атқарамын. Ұстанымым - шәкірттерімнің көңілін тауып, тәжірибеме сай білімді, білікті ұрпақ өсіру.

      Жалпы қоғамда ұстаз мәртебесі туралы тақырып қозғалса, пікір айтушылар екіге бөлінеді. Әрине, көбісі ұстаздардың мәртебесінің жоғары болуы, оның білімділігінде дегенге тоқталады. Қазіргі заманның өркениетіне сай мемлекет ұстаздар мәртебесін көтеруді айрықша қолға алуда. Өкіметтен қолдау ерекше болған сайын ұстаздардың біліктілігі де соған сай болуы керек деп ойлаймын. Өз басым шәкірттермен жұмыс жасағанда әрдайым тәжірибелі ұстаз ретінде көрінуді мақсат етемін. Биыл еліміз ұстаздарға деген ерекше қамқорлықты қалыптастыру, ұстаз мәртебесін көтеру мақсатында көптеген игі жоспарларды қабылдады. Жалпы жыл сайын жаңғырып келе жатқан бұл игі бастамаға жас мамандарды тарту, оларға 'дипломмен ауылға' бағдарламасын жасақтап баспаналы болдыру, айлық жалақысын көтеру сынды көптеген оңтайландырылған шараларды қабылдауда. Міне ,осының бәрі қоғамдағы ұстаз мәртебесінің жоғары болуын қолға алуға қосқан бастама деп түсінген жөн. Өз басым күнделікті таңертең мектеп ауласына жақындағанда, балалардың сыңғырлай күлген дауыстарынан қуанышқа бөленемін. Мектепке кіргеннен-ақ, өзімді мазалаған сан түрлі ойлардан арылып, оқушыларымның тәтті қылықтарымен әдемі жүздерінен шаттанамын. «Баласыз үй мазар, балалы үй базар»- деп ата- бабаларымыз бекер айтпаса керек. Балалардың әр күні біздің көз алдымызда өтіп жатыр. Алдымызға келген балалар - біреудің маңдай алды жарығы, енді бірі – жал дегенде жалғызы, бірі – ерке, бірі – қой аузынан шөп алмас момыны. Маңдай алды жарығын Таңшолпандай жарқыратып, жал дегенде жалғызды көпшілдікке үйретіп, қой аузынан шөп алмасты ортада жарқылдап сөйлер шешен қылып тәрбиелеу үшін қажымас қайрат пен батырлық қажет.

     Мектеп — балалардың екінші үйі болса, ал ұстаздар екінші анасы десек те артық етпейді. Әр үйдің еркелерін бір арнаға тоғыстырып, олармен жұмыс жасау оңайға соқпайды. Алайда баланың тілін тауып, тілдесу, жақсы тәрбие берудің өзі бір үлкен ғанибет. Ақ парақ бетіне сызу сызғандай баланың кіршіксіз санасына алғашқы адамгершілік, мейірімділік нұрын сеуіп, білім, өнер нәрімен сусындату мына біз- мұғалімдердің еншісінде. Сондықтан да өз мамандығымды ерекше мақтан тұтамын. Әр ұстаз қоғам алдындағы жауапкершілікті сезінсе, ұстаз мәртебесінің артары сөзсіз. Ғылым мен білімді игеретін талантты ұрпақ өсіру біздің қолымызда. Ұстаздар мәртебесі арта берсін!

Тәженова Жания Сағындыққызы

  • 40
Жедел желі
+7 775 007 54 41

Бос мұғалімді іздеу...

Daryn.Online

Қосымшаны жүктеу
Жүктеу